Sipas njoftimit të komunës, trajtimi i qenve endacakë do të ndahet në shtatë grupe, ku do të përfshihen të gjitha lagjet e kryeqytetit dhe zonat rurale.
Ky vendim i komunës vije pas shumë ankesash dhe sulmeve të qenve endacak ndaj qytetarëve.
”Në bazë të aplikacioneve të pranuara, më së shumti gjashtë kandidatë do të ftohen për të dorëzuar tenderët e detajuar të kësaj kontrate. Nëse më shumë se gjashtë kandidatë të përshtatshëm i plotësojnë kriteret e mësipërme të përzgjedhjes, përparësitë dhe dobësitë relevante të aplikacioneve të këtyre kandidatëve do të ri ekzaminohen për të identifikuar gjashtë aplikacionet më të mira për procedurën e tenderit”, thuhet në njoftim.
Kuvendi Komunal të enjten e 5 majit ka hapur tender për këtë çështje.
Afati i fundit për pranim të tenderëve është 23 maj 2022.
Qentë endacakë vazhdojnë të jenë problem permanent me të cilin përballet Prishtina, por edhe qytetet e tjera në Kosovë.
Bazuar në të dhënat e Policisë së Kosovës të dërguara në adresë të Telegrafit, 41 qytetarë janë sulmuar nga qentë endacakë në Prishtinë dhe po aq kanë pësuar lëndime trupore, vetëm gjatë periudhës janar-mars 2022. Sipas këtyre të dhënave, gjatë vitit 2021 janë sulmuar gjithsej 89 qytetarë, ndërsa prej tyre 69 kanë marrë lëndime.