Presidenti rus, Vladimir Putin, u takua me shefin e mercenarëve të “Wagner”-it, Yevgeny Prigozhin dhe komandantët e tij të tjerë, vetëm pesë ditë pas kryengritjes së ndërprerë, ata u zotuan për besnikëri ndaj regjimit të tij, ka thënë Kremlini.
Takimi prej tri orësh u zhvillua më 29 qershor, tha dje zëdhënësi i Kremlinit Dmitry Peskov, në një përpjekje të mundshme për të portretizuar një kthim në normalitet në lidhjet midis dy burrave që u përballën në rebelimin më të madh ushtarak që Rusia ka parë në dekada.
Ndërsa, asnjë koment nuk është dhënë nga vetë Prigozhin për takimin, i cili nuk u pa në publik që nga kryengritja kundër presidentit rus, Putin.
Gjatë takimit, Putin dha një vlerësim të veprimeve të “Wagner”-it në fushën e betejës në Ukrainë, ku mercenarët kanë luftuar përkrah trupave të rregullta ruse, si dhe të vetë revoltës.
Ndërsa, në anën tjetër, Joe Biden, do të takohet me presidentin ukrainas, Volodymyr Zelensky, në samitin e NATO-s në Lituani, raporton “The Independent”, transmeton Portali Dukagjini.
Takimi vjen pasi presidenti amerikan, Joe Biden, shprehu dyshime ditëve të fundit për qëllimin e shumëkërkuar të Ukrainës për t’u bashkuar me aleancën transatlantike (NATO). Dy liderët u takuan për herë të fundit në Japoni në maj për samitin e G7-s.