“Në Ditën Ndërkombëtare të Fëmijëve të Zhdukur, ne kujtojmë me respekt fëmijët që ishin viktima të zhdukjeve të dhunshme nën regjimin serb në Kosovë.”
Kështu ka shkruar Ministria e Punëve të Jashtme dhe Diasporës në një postim në Twitter, për të shënuar Ditën Ndërkombëtare të Fëmijëve të Zhdukur.
Po ashtu, MPJD-ja ka deklaruar se Ministria është e përkushtuar për t’i mbajtur përgjegjës autorët e krimeve të tyre, në lidhje me fëmijët e zhdukur në luftën e fundit në Kosovë.
Gjatë viteve të luftës në Kosovë më 1998-99 dhe në muajt e parë pas mbarimit të luftës, u vranë 1.024 fëmijë dhe 109 konsiderohen të zhdukur.
Nga këta 1.133 fëmijë, 100 i përkasin komuniteteve të tjera si serbë, romë, ashkali, egjiptas, boshnjakë e të tjerë.
Ndërsa, gjatë luftës në Kosovë humbën jetën rreth 13.500 persona, shumica dërmuese shqiptarë, ndërsa rreth 1.600 ende konsiderohen të pagjetur.
Kujtojmë se, ditëve të fundit, Prokuroria Speciale e Kosovës ka ngritur tri aktakuza në mungesë kundër të pandehurve Ç.A. dhe D.R, G.P, të dyshuar për krime lufte në Kosovë, më 1999 – dhe paralajmëroi se do të ngrejë edhe të tjera.
Këto janë tri aktakuzat e para në mungesë për krime lufte në Kosovë, pasi deri vonë Kodi i Procedurës Penale nuk i ka lejuar të tillat.
Njohësit e çështjeve të drejtësisë, vlerësojnë se aktakuzat në mungesë janë efektive për dokumentimin e krimeve të luftës dhe se përveç aspektit ndëshkues, do të përmbushen qëllimet tjera të dënimit, si sjellja e drejtësisë ndaj viktimave dhe kompensimi i tyre.