Kryeministri i Kosovës, Albin Kurti, ka ftuar qytetarët e Kosovës, pronarët e veturave me targa “PR”, “KM”, “PZ”, “GL”, “UR”, “PE”, “DA” dhe “ĐA” që t’i konvertojnë ato në targa RKS në dy muajt e ardhshëm, gjatë të cilëve janë të liruar nga taksa e detyrime që arrijnë vlerën deri në pesë euro.
Me anë të një postimi në llogarinë e tij në Facebook, kryeministri Kurti ka thënë se nga data një shtator e deri më 31 tetor, do të zhvillohet procesi i konvertimit të targave të veturave të lëshuara nga Serbia në ato të Kosovës.
“Nga sot e deri më 31 tetor, për gjithsej 61 ditë, në 34 qendra komunale të Regjistrimit të Automjeteve do ta zhvillojmë procesin e konvertimit të targave të veturave të lëshuara nga Serbia në ato të Republikës së Kosovës”, ka thënë Kurti.
Ai ka theksuar se në Kosovë janë gjithsej 401 mijë e 945 vetura me targa RKS.
“Prej tyre dhjetëra mijëra janë me pronarë të komuniteteve pakicë. Ato që duhet të konvertohen përbëjnë vetëm rreth 2% të tyre”, shtoi ai.
Sipas Kurtit, konvertimi dhe regjistrimi i automjeteve me targa “RKS” i shërben rendit publik, ligjit dhe sigurisë.
Kreu i qeverisë ka theksuar se targat e lëshuara nga Serbia “PR”, “KM”, “PZ”, “GL”, “UR”, “PE”, “DA” dhe “ĐA”, janë trashëgimi e regjimit të Millosheviqit.
“Kjo trashëgimi është barrë që nuk do të duhej ta mbani ju. Përveç kësaj ajo po synon t’ju mbajë në të kaluarën dhe të izoluar”, shtoi ai.
“Konvertimi në targa “RKS eliminon këtë barrë dhe ju siguron lëvizje të lirë të papenguar dhe pa paragjykime në të gjithë territorin e Kosovës”.
Kurti potencoi se fushata e informimit do të vazhdojë.