Përfaqësuesi i Posaçëm i Bashkimit Evropian për Dialogun Kosovë-Serbi, Miroslav Lajčák, pritet të takohet me Kryeministrin e Kosovës, Albin Kurti.
Takimi do të mbahet në ndërtesën e Qeverisë së Republikës së Kosovës në orën 14:00, ka njoftuar Zyra e Kryeministrit.
Para pak ditësh, Kurti kishte zhvilluar një takim me Lajçak, për të cilin, Lajçak kishte thënë se ishte me qëllim të vazhdimit të bisedimeve për normalizimin e marrëdhënieve ndërmjet Kosovës dhe Serbisë.
“Isha në Prishtinë sot, për të vazhduar bisedimet me kryeministrin Kurti, për normalizimin e marrëdhënieve ndërmjet Kosovës dhe Serbisë”, kishte deklaruar Lajçak.
Më tej, ai kishte treguar se cilat tema i ka diskutuar me krerët e Qeverisë së Kosovës.
“Gjithashtu kisha takim edhe me zëvendëskryeministrin e parë të Kosovës, Bislimi, për çështjen e veturave dhe lirisë së lëvizjes, për personat e zhdukur dhe për energjinë”.
Ndërkaq, kjo vizitë e Lajçak vjen pikërisht në kohën kur ShBA-të dhe BE-ja i kanë kërkuar Kosovës shtyrjen për 10 muaj të afatit për konvertimin e targave ilegale të Serbisë në ato të RKS-së.
Përfaqësuesit special për dialogun Kosovë-Serbi, Miroslav Lajçak, i është vazhduar mandati deri më 31 gusht të vitit 2024.
Mirëpo, nga momenti kur e ka marrë këtë pozitë, mes palëve janë arritur vetëm dy marrëveshje, ajo për targa dhe marrëveshja për energjinë.