Kryeministri i Kosovës, Albin Kurti ka thënë se është i gatshëm që të shkojë në Bruksel, në takimin që e ka përmendur Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell për ti informuar më hollësisht me të dhënat në lidhje me kidnapimin e policëve të Kosovës nga forcat serbe.
Borell kishte thënë se do t’i ftojë përfaqësuesit e Kosovës dhe Serbisë këtë javë në Bruksel, një takim urgjent për menaxhim të krizave.
“Unë së pari erdha të ju njoftoj me këto të gjeturat që janë interes i madh i familjeve dhe opinionit publik në Kosovë. Do të komunikoj edhe me Brukselin. Jam i gatshëm, ta kuptojnë që deeskalimi i situatës që po e kërkojnë të gjithë nënkupton lirimin e mënjehërshëm të tre policëve dhe dënimi i agresionit të Serbisë në Kosovë për këtë krim që është bërë ndaj tre policëve, familjes dhe Republikës sonë dhe normalizimi nënkupton zbatimin e menjëhershëm të Marrëveshjes bazike dhe pa kushte. Deeskalimi drejt paqes nënkupton drejtësi. Duam drejtësi ndërkombëtare jo vetëm vendore sepse atë e bëjnë organet tona”, ka thënë Kurti.
Për shkak të rritjes së tensioneve, BE-ja ka ftuar një takim krize gjatë kësaj jave.
Por, presidenti i Serbisë, Aleksandër Vuçiq, ka refuzuar të takohet me kryeministrin e Kosovës, Albin Kurti.
Ndërsa Kurti ka thënë se nuk do të vendosë për pjesëmarrje në takimin e Brukselit, pa kuptuar gjendjen e tre policëve, që po mbahen në Serbi.