Kryeministri në detyrë i Kosovës, Albin Kurti, ka pritur në takim admiralin amerikan George M. Wikoff, komandant i Komandës së Forcave të Përbashkëta Aleate të NATO-s në Napoli, i cili shoqërohej nga komandanti i KFOR-it, gjeneralmajor Özkan Ulutaş.
Përmes një postimi në Facebook, Kurti bëri të ditur se ky ishte takimi i dytë me admiralin Wikoff, pas atij të zhvilluar në janar, ndërsa në fokus të bisedës ishin situata e sigurisë në Kosovë dhe bashkëpunimi ndërmjet institucioneve të Kosovës dhe NATO-s.
Kurti shprehu mirënjohjen për përkushtimin e NATO-s në garantimin e një mjedisi të qetë dhe të sigurt për të gjithë qytetarët dhe komunitetet në Kosovë, duke vlerësuar njëkohësisht kontributin e vazhdueshëm të Aleancës për paqen e qëndrueshme dhe stabilitetin afatgjatë në Kosovë dhe në rajonin e Ballkanit Perëndimor.