Kryeministri i Kosovës, Albin Kurti në postimin e tij nuk e ka përmendur arritjen e marrëveshjes në mes Kosovës dhe Serbisë për dokumentet hyrëse-dalëse, por, ka thënë se reciprociteti duhet të jetë fryma e zgjidhjeve parimore.
Po ashtu, ai ka treguar se javën e kaluar ka diskutuar për masat reciproke, për targat e makinave dhe dokumentet e hyrje-daljeve me Serbinë, por edhe për fuqinë e re të Kosovës për punë, të kualifikuar, luftën kundër korrupsionit dhe forcimin e demokracisë.
“Reciprociteti duhet të jetë fryma e zgjidhjeve parimore”, ka shkruar Kurti në Twitter, ndërsa, ka shpërndarë një intervistë që ka dhënë javën e kaluar për “Die Welt”.
Reciprocity should be the spirit of principled solutions. Last week I spoke to @welt about our reciprocal measures on car plates & entry-exit docs w/ Serbia but also about our young, skilled labour force, fight against corruption & strengthening democracy. https://t.co/giWnnTbfEJ
— Albin Kurti (@albinkurti) August 27, 2022
Gjithashtu, presidentja e Kosovës, Vjosa Osmani ka deklaruar se nga tani do të vazhdojnë “pandalshëm” drejt njohjes reciproke, mes Kosovës dhe Serbisë.
Ndërsa, ajo ka falënderuar Shtetet Bashkuara të Amerikës (ShBA), që sipas saj kanë një rol mbështetës.
Njoftimit për arritje të marrëveshjes mes Kosovës dhe Serbisë i është bashkuar edhe përfaqësuesi i posaçëm i BE-së në dialogun mes dy shteteve, Miroslav Lajçak, i cili e ka falënderuar SHBA-në për angazhimin e tyre.
Ai ka falënderuar emisarin e SHBA-së për Ballkanin Perëndimor, Gabriel Escobar, për arritjen e marrëveshjes ndërmjet Kosovës e Serbisë, për dokumentet hyrje-dalje.
Ndërsa, gjatë kësaj jave, Escobar dhe Lajçak qëndruan në Kosovë dhe Serbi, ku diskutuan me liderët shtetërorë dhe partiakë për çështjen e dokumenteve dhe targave. Ata thanë se palët duhet të zotohen se do të shmangin dhunën më 1 shtator.
Vendimi i 26 qershorit i Qeverisë së Kosovës për targat dhe dokumentet serbe rriti tensionet në veri të vendit.
Por, bashkësia ndërkombëtare u angazhua për të bindur palët që të arrinin marrëveshje për të shmangur përshkallëzimin e situatës më 1 shtator, kur duhej të hynte në fuqi vendimi për dokumentet serbe, por edhe për targat.
Borrell: Kemi marrëveshje, Serbia ka vendosur t’i pranojë dokumentet e Kosovës