Lidhja Demokratike e Kosovës (LDK) ka mbajtur takim me përfaqësuesit e Sindikatës së Bashkuar të Arsimit, Shkencës dhe Kulturës (SBAShK).
Deputetët e kësaj partie, Arben Gashi, Avdullah Hoti dhe Hykmete Bajrami, me përfaqësuesit e SBAShK-ut kanë diskutuar për sektorin e arsimit ku është thënë se problemi i menaxhimit të sistemit arsimor nga qeveria vazhdon të jetë një sfidë e madhe që kërkon vëmendje dhe veprim të shpejtë.
Shefi i Grupit Parlamentar të LDK-së, Arben Gashi, në një postim në Facebook tha se lajmi i mirë nga ky takim është se viti shkollor do të fillojë siç ishte parashikuar më 2 shtator.
Në këtë takim është diskutuar edhe për kontratën kolektive, për të cilën, Gashi ka thënë se duhet të nënshkruhet sa më shpejt.
“Një problem shqetësues mbetet kontrata kolektive, e cila duhet të nënshkruhet sa më shpejt ndërmjet qeverisë dhe sindikatave, si dhe ligji për pensionet, ku vazhdon diskriminimi i punëtorëve të Republikës së Kosovës gjatë viteve ’90, me një fokus të veçantë në diskriminimin e mësimdhënësve të asaj periudhe. Lajmi i mirë nga ky takim është se viti shkollor do të fillojë siç ishte parashikuar më 2 shtator. Megjithatë, problemi i menaxhimit të sistemit arsimor nga qeveria vazhdon të jetë një sfidë e madhe që kërkon vëmendje dhe veprim të shpejtë”, ka shkruar Gashi në Facebook.
Tutje, ai ka theksuar se Grupi Parlamentar i LDK-së mbetet i angazhuar për të mbështetur përpjekjet për përmirësimin e cilësisë së arsimit dhe për të adresuar problemet që ndikojnë në sistemin arsimor.
“Grupi Parlamentar i LDK-së mbetet i angazhuar për t’i mbështetur përpjekjet për përmirësimin e cilësisë së arsimit dhe për t’i adresuar problemet që ndikojnë në sistemin arsimor. Ne do të vazhdojmë të punojmë ngushtë me SBASHK-un dhe aktorët e tjerë relevantë për të siguruar që nevojat e mësuesve dhe nxënësve të përmbushen dhe që arsimi në Kosovë të përparojë në mënyrë të qëndrueshme”, ka vijuar ai.