Deputetja e Lëvizjes Vetëvendosje, Adriana Matoshi, ka ironizuar me opozitën në seancën e Kuvendit të enjten, ku po diskutohet për gjendjen në shëndetësi dhe sigurimet shëndetësore.
Ajo është shfaqur veshur me një bluzë të bardhë, në të cilën shkruan “Sigurimet shëndetësore janë kry pardje nga PDK-LDK-AAK”.
Më tej, shkruan se “Qysh kem tu nejt, veç kur i ka nal Qeveria Kurti”.
Gjatë diskutimit, deputetët e opozitës kanë kritikuar Qeverinë për mospunë në sektorin e shëndetësisë. Sipas tyre, Qeveria Kurti nuk e ka realizuar asnjë nga premtimet e saj në këtë sektor dhe për tri vjet qeverisje nuk ka lënë asnjë shenjë.
Kritikave u është përgjigjur ministri i Shëndetësisë, Arben Vitia, i cili ka thënë se Qeveria Kurti është dashur të merret me një listë dështimesh të qeverive të kaluara.
Ai ka thënë se para tri vjetësh kur kanë ardhur në pushtet, nuk e kanë gjetur asnjë hap në drejtimin e duhur sa u përket sigurimeve shëndetësore.
Këtë seancë e ka propozuar Aleanca për Ardhmërinë e Kosovës (AAK).
Deputeti i AAK-së, Shemsedin Dreshaj, ka thënë se Kosova vazhdon të jetë vendi i vetëm në rajon pa sigurime shëndetësore.
“Kjo seancë është ftuar bazuar në rrethanat aktuale për gjendjen në shëndetësi. Vazhdojmë të jemi vendi i vetëm në rajon pa sigurime shëndetësore. Vetëm ne aspektin kohor kërkohen së paku 2 vjet për ligjin për sigurimet shëndetësore dhe rregulloret e nevojshme”, ka theksuar Dreshaj.