Policia e Kosovës njofton se është ndaluar i dyshuari në Gjilan që ishte u.d. menaxher i departamentit në një kompani.
Përmes një komunikate për media Polcia njofton se i dyshuari ka vepruar në kundërshtim me autorizimet e tij ekonomike dhe duke keqpërdorur besimin e kompanisë, e ka dëmtuar kompaninë dhe buxhetin e komunës në mijëra euro, sepse i njëjti nuk ka lëshuar kupon fiskal për blerjet e konsumatorëve.
“Artikujt e blerë nga konsumatorët, fillimisht janë regjistruar nga i dyshuari, por për të përvetësuar paratë për nevojat e tij personale dyshohet se ai nuk e kishte printuar fare kuponin fiskal, që ishte detyrë dhe obligim i tij”, thuhet në komunikatën për media.
Tutje bëhet e ditur se i dyshuari i lartcekur është intervistuar nga Policia në prani të avokatit të tij mbrojtës dhe në bazë të dyshimit të arsyeshëm, prokurori i shtetit ka nxjerrë aktvendim për ndalimin e tij për 48 orë, për vepër penale “Keqpërdorimi i besimit” sipas kodit penal të Republikës së Kosovës.