Zëvëndëskryeministri i Republikës së Kosovës, Besnik Bislimi dhe ministrja e Arsimit, Shkencës, Teknologjisë dhe Inovacionit (MASHTI), Arbërie Nagavci, gjatë vizitës së tyre në Luginën e Preshevës, në shkollën “Zenel Hajdini” në fshatin Raincë, kanë shpërndarë libra në gjuhën shqipe për disa lëndë të ndryshme për fëmijët shqiptarë.
Në mesin e atyre librave është edhe abetarja e përbashkët për Kosovë dhe Shqipëri. Kjo abetare vjen si rezultat i bashkëpunimit të dy ministrive të Arsimit, të Kosovës dhe të Shqipërisë, si dhe dy shtëpive botuese fituese “Dukagjini” dhe “Pegi”.
Gjatë ditës së hënë, Bislimi bashkë me Nagavcin e kanë vizituar edhe deputetin e vetëm shqiptar në Kuvendin e Serbisë, Shaip Kamberin.
Po ashtu, delegacioni nga Kosova, ka pasur takim edhe me përfaqësuesit e Këshillit Kombëtar Shqiptar në Bujanoc.
Aty, Bislimi ka thënë se përveç fondit dy milionësh të ndarë për Luginën, do të ketë edhe ndihma të tjera.