Fehim Sali është arrestuar nën dyshimet për veprën penale të spiunazhit, në një operacion të përbashkët të Agjencisë Kosovare të Inteligjencës (AKI), Policisë së Kosovës dhe Prokurorisë Speciale.
RTK raporton se Sali dyshohet se për një periudhë të gjatë ka bashkëpunuar me Agjencinë serbe të Inteligjencës (BIA) dhe se ka mbajtur kontakte me zyrtarin e saj, Zelimir Matoviq.
Sipas raportimit, Sali punon si arsimtar në shkollën serbe “9 Maji” në Rapçë të Dragashit. Më herët, ai ka qenë i angazhuar edhe në Këshillin Konsultativ për Komunitete pranë Zyrës së Presidentes.
RTK raporton gjithashtu se ndaj tij ekzistojnë dyshime se është marrë me ndërmjetësimin për prona dhe dokumente serbe, si dhe se është angazhuar në grumbullimin e votave për mbështetësit e presidentit serb, Aleksandar Vuçiq.
Rasti është duke u trajtuar nga institucionet kompetente.
Portali Dukagjini ka kontaktuar me Prokurorinë Speciale për t’i konfirmuar këto informacione. Sapo të ketë përgjigje, artikulli do të përditësohet