Gjykata Themelore në Ferizaj ka aprovuar kërkesën e Prokurorisë Themelore të Ferizajt, për caktimin e masës së paraburgimit kundër të pandehurit D.S, i dyshuar për dhunimin e 12 vjeçares.
Të njëjtit i është caktuar masa e paraburgimit në kohëzgjatje prej një muaj.
“Gjykata Themelore në Ferizaj, ka aprovuar kërkesën e Prokurorisë Themelore të Ferizajt, për caktimin e masës së paraburgimit kundër të pandehurit D.S. shtetas i Republikës së Kosovës, për shkak të dyshimit të bazuar se ka kryer veprën penale dhunimi nga neni 227 paragrafi 7 lidhur me paragrafin 1 të Kodit Penal të Republikës së Kosovës (KPRK)”.
Tutje thuhet se pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake i Departamentit për Krime të Rënda – Habib Zeqiri, ka vlerësuar se ekziston dyshimi i bazuar, se i pandehuri me datë 20 nëntor 2022, në kohë të pacaktuar, në një fshat në Komunën e Ferizajt, përkatësisht në shtëpinë e tij, ka keqpërdorur seksualisht të dëmtuarën – e mitur, e cila është nën moshën katërmbëdhjetë (14) vjeçare, me ç`rast ka kryer akt seksual me të dëmtuarën.
“Gjyqtari i procedurës paraprake, kërkesën e prokurorit të shtetit për caktimin e masës së paraburgimit kundër të pandehurit e ka aprovuar si të bazuar konform dispozitave të KPPRK-së, dhe të njëjtit i është caktuar masa e paraburgimit në kohëzgjatje prej një (1) muaj”.
Ndryshe, vendi ku dyshohet se ka ndodhur dhunimi i 12-vjeçares nga Ferizaji mësohet të jetë shtëpia e te dyshuarit i cili është 19 vjeç.
Kryeprokurori i Prokurorisë Themelore në Ferizaj, Shukri Jashari, për RTV Dukagjinin, ka thënë se viktima ka shkuar me vullnet në shtëpinë e të dyshuarit.
Ndryshe, për rastin ka njoftuar Policia e Kosovës përmes raportit 24 orësh.
“Ferizaj 21.11.2022 – 01:00. Ankuesja femër kosovare ka raportuar se vajza e saj e moshës 12 vjeçare ka dalë nga shtëpia dhe nuk dinte për vendndodhjen e saj. Njësitë policore kanë arrite të gjejnë viktimën”, thuhet në raportin policor.
I dyshuari u bë e ditur se është arrestuar dhe pas intervistimit me vendim të prokurorit, është dërguar në mbajtje.
Rasti i 12-vjeçares në Ferizaj, ngjarja ka ndodhur në shtëpinë e të dyshuarit