Ministrja e drejtësisë, Albulena Haxhiu tha se ambasadori Berishaj do t’i përgjigjet kërkesave të institucioneve të Kosovës në lidhje me akuzat që i janë bërë atij.
Pas kësaj deklarate, kanë reaguar deputetët e partive opozitare, të cilët e akuzuan ministren Haxhiu se po e bën “avokaten” e ambasadorit.
Shefi i grupit parlamentar të PDK-së, Abelard Tahiri, ka thënë se është e çuditshme se s’është bërë akoma një javë që janë hedhur dyshimet për një skandal të mundshëm të ambasadorit Martin Berishaj, e ai vetë nuk i ka demantuar këto dyshime. Sipas tij, ministrja Albulena Haxhiu është në një “zor të madh”, sepse po i justifikon veprimet e ambasadorit.
“Është e pabesueshme se si një ambasador që nxjerr fakte për të, ende nuk ka arritur ta demantojë, e kemi pritur një konferencë nga ai, që nuk ka të bëjë asgjë me to. Sot, del ministrja e drejtësisë për ta justifikuar, d.m.th. është në një zor të madh. Berisha nuk po mundet ta demantojë, që i ka marrë 600 mijë euro përmes një kompanie me një punëtor të regjistruar. Është me rëndësi që të dihet a është tradhëti kombëtare, a i kemi njerëzit tanë të paguar që po i shërbejnë tjerëve, apo shfrytëzohet imuniteti diplomatik i një diplomati me bartur para me çantë”, ka deklaruar Tahiri.
Ndërkaq, Ramush Haradinaj ka thënë se ministrja Haxhiu po bëhet “avokate”, e ambasadorit.
“Apo e shihni ku keni mbërritur, ministrja e drejtësisë kthehet në avokate, a kanë qenë këto qëllimet tuaja. Sot, minimumi ka thënë se do të zbatohet ligji për secilin, dhe jo vëtëm per Berishajn, por për të gjithë”, ka deklaruar Ramush Haradinaj.
Kurse Arben Gashi i LDK-së, ka thënë se në të kaluarën ministrja Albulena Haxhiu, i quante të tjerët kriminel, dhe nuk priste vendime të gjykatave.