Në një urim për 28 Nëntorin, presidentja e Kosovës, Vjosa Osmani, ka theksuar rëndësinë historike të kësaj dite, duke e cilësuar atë si një kujtim të sakrificave për liri, paqe dhe krenari.
Në postimin e saj në Facebook, Osmani ka përmendur tri momente kyçe që, sipas saj, janë pjesë e një simbioze të rëndësishme të 28 Nëntorit.
“Më 28 nëntor, nderojmë historinë, flamurin dhe identitetin kombëtar, duke riafirmuar përkushtimin tonë për fuqizimin e shteteve tona. 28 Nëntori nuk është vetëm simbol i betejave dhe triumfeve tona, por edhe kujtim i sakrificave tona për të qenë të lirë, në paqe dhe krenarë. 28 Nëntori është simbiozë e tri momenteve historike që e lartësojnë kombin tonë: ngritja e flamurit në Vlorë dhe shpallja e pavarësisë së Shqipërisë, dalja publike e UÇK-së dhe ditëlindja e komandantit legjendar Adem Jashari”, ka shkruar Presidentja Osmani.
Ajo e mbylli mesazhin e saj duke u bërë thirrje qytetarëve që të bashkohen në këtë ditë të shënuar, duke festuar me krenari dhe unitet.