Presidentja e Republikës së Kosovës, Vjosa Osmani, ka pritur të enjten e 15 dhjetorit në takim ambasadorin e Shteteve të Bashkuara të Amerikës, Jeffrey Hovenier me të cilin siç njofton Zyra e Presidencës ka biseduar për zhvillimet e fundit, me theks të veçantë dorëzimi i aplikimit për anëtarësim në Bashkimin Evropian.
Osmani ka theksuar se ky aplikim përbën një hap të rëndësishëm për përmbushjen e vizionit të Kosovës për integrim në strukturat euroatlantike.
Ndër të tjera, siç njofton Zyra e Presidencës në takim është diskutuar edhe për zhvillimet në veri, gjersa theksohet se Osmani ka nënvizuar përkushtimin e institucioneve për koordinim të rregullt e të vazhdueshëm me Shtetet e Bashkuara dhe aleatët tjerë.
Ndryshe, Kosova, të enjten e 15 dhjetorit, ka aplikuar për anëtarësim në Bashkimin Evropian.
Kryeministri i Kosovës, Albin Kurti, ka dorëzuar aplikimin në Republikën çeke, vendin që aktualisht kryeson Presidencën e BE-së.
Ceremonia e dorëzimit është mbajtur në ndërtesën e Qeverisë çeke, në Pragë.