Presidentja e Kosovës, Vjosa Osmani, ka pritur të enjten në takim të rregullt ambasadorin e Shteteve të Bashkuara të Amerikës, Jeffrey Hovenier.

Siç ka njoftuar Zyra e Presidencës, gjatë takimit presidentja Osmani dhe ambasadori Hovenier kanë diskutuar për zhvillimet e fundit në procesin e dialogut me Serbinë.

Po ashtu, gjatë takimit të tyre është diskutuar edhe për momentumin e ri për anëtarësimin e Kosovës në organizata ndërkombëtare dhe forcimin e pozitës ndërkombëtare të saj.

Ndër të tjera, në njoftimin e Presidencës thuhet se në takim është biseduar për zhvillimet e fundit ashtu si në vend edhe në rajon.

Gjithashtu, presidentja në takim me Hovenier ka diskutuar edhe për përkushtimin e përbashkët për bashkëpunim dhe koordinimin të vazhdueshëm në mes të institucioneve të  Kosovës dhe Shteteve të Bashkuara të Amerikës, me theks të veçantë në rëndësinë e avancimit tutje të raporteve bilaterale.