Ushtruesi i detyrës së kryetarit të Organizatës së Veteranëve të Luftës së UÇK-së, Faton Klinaku, ka thënë se do të jenë pjesëmarrës në protestën e organizuar nga fëmijët e dëshmorëve të UÇK-së.
Kjo protestë që do të mbahet në sheshin Skënderbeu në Prishtinë, u thirr për shkak të deklaratës së kryeministrit të Kosovës, Albin Kurti, për politikanin serb Oliver Ivanoviq, të cilin Kurti e përshkruajti si njeri të përkushtuar.
“E mbështes protestën dhe do të jem pjesëmarrës në të. Kërkoj që të mbështetet edhe nga ju”, ka shkruar Klinaku.
- Kurti përkujton Ivanoviqin: Ky krim vrau jo vetëm atë, por edhe pluralizmin politik te serbët
- Kurti e VV-ja brenda 4 viteve deklarata të kundërta për Ivanoviqin
Kurti, përkujtoi vdekjen e liderit të Iniciativës Qytetare SDP, Ivanoviq.
“Sot, ne përkujtojmë jetën dhe kujtimin e Oliver Ivanoviqit, në ditën e vdekjes së tij. Mendimet dhe ngushëllimet e mia janë me familjen dhe miqtë e tij”, ka thënë ai.
Kurti ka theksuar se “Oliver Ivanoviq ishte një person i përkushtuar për të luftuar për interesat e komuntetit dhe qytetit të tij”.
“Ai e bëri këtë duke qenë i hapur, i sinqertë, gjithmonë i mprehtë në çështjet me rëndësi, por edhe i respektueshëm edhe ndaj atyre, me të cilët, nuk ishte dakord. Do të dëshiroja që kujtimi i tij të mbetet i gjallë, kujtimi i tij si një njeri që punoi për një të ardhme të qëndrueshme dhe për një Kosovë shumë etnike”, ka shtuar Kurti.