Grupi Punues për trajtimin e çështjes së projektligjit për tekste shkollore ka vazhduar pa pjesëmarrjen e deputetëve të opozitës, të cilët pas përplasjeve të ashpra me ministren e Arsimit lidhur me kërkesën për verifikimin e votave për miratimin e këtij projektligji, lëshuan sallën.
Pas largimit të deputetëve Ardian Kastrati, Vlora Dumoshi dhe Albena Reshitaj nga grupi punues, tani pjesëmarrës të këtij procesi janë vetëm deputetët e Vetëvendosjes (VV) dhe deputeti përfaqësues i komuniteteve, Enis Kervan.
PDK-ja e ka akuzuar Qeverinë në lidhje me projektligjin për tekste shkollore, duke e cilësuar procesin si “ilegal klandestin” dhe “kontrabandues”.
Partitë opozitare e kanë kundërshtuar mbajtjen e mbledhjes së grupit punues për projektligjin për tekstet shkollore pa konfirmuar se ligji ka kaluar në kuvend.
Edhe deputeti i Lëvizjes Vetëvendosje, Ardian Gola, e ka pranuar që projektligji për tekste shkollore mund të mos i ketë pasur votat, por ka thënë se është një vendim i cili është i kontestuar e që, sipas tij, grupi punues duhet t’i vazhdojë punimet.
Gjatë vazhdimit të mbledhjes, Kastrati i PDK-së është përplasur me ministren e Arsimit, Arbërie Nagavci, të cilën e ka akuzuar për vjedhje votash në miratimin e këtij projektligji.