Shefi i grupit parlamentar të PDK-së, Arian Tahiri, dhe deputetja Vlora Çitaku u kanë bërë thirrje deputetëve të Lëvizjes Vetëvendosje që të kthehen në Kuvend dhe të votojnë në lexim të dytë Ligjin për Dhomat e Specializuara.
Në një konferencë për media, Tahiri ka thënë se miratimi i këtij ligji është obligim dhe përgjegjësi kombëtare e secilës forcë politike dhe secilit deputet.
“Është obligim dhe përgjegjësi kombëtare e secilës forcë politike dhe e secilit deputet me miratu ligjin edhe në leximin e dytë. Populli është i bashkuar dhe i unifikuar. Pas datës 16 shtator, qëllimi i PDK-së ka qenë unifikimi dhe jo pazari. ‘Votoma presidentin ta votoj ligjin’, kjo është e pandershme”, ka deklaruar Tahiri.
Ndërkaq, Çitaku ka thënë se votimi i ligjit nuk duhet të shihet si favor ndaj ndonjë partie, por si obligim.
“I bëjmë thirrje VV-së që të vijë në Kuvend dhe të miratojë ligjin në lexim të dytë. Ky nuk është favor, është obligim. Ne jemi këtu dhe nuk do të largohemi”, ka deklaruar Çitaku.
PDK-ja ka përsëritur kështu kërkesën që deputetët e Vetëvendosjes të rikthehen në sallë, në mënyrë që të procedohet me votimin e projektligjit në lexim të dytë.