Dy persona janë plagosur me armë zjarri në komunën e Rahovecit. Lajmin për Portalin Dukagjinin e konfirmoi Sheremet Elezaj, zëdhënës i Policisë për rajonin e Gjakovës.
Të dyshuarit, sipas tij, janë dorëzuar, derisa po ashtu ka bërë të ditur se viktimat janë dërguar në emergjencë për trajtim.
“Rreth orës 16:40 është raportuar se dy persona në rrugën “Fahri Fazliu” në Rahovec, ishin qëlluar me armë. Policia menjëherë iu ka përgjigjur rastit dhe nga informacionet e para të marra, është konfirmuar se dy persona, meshkuj të moshës madhore, janë dërguar në spitalin rajonal në Gjakovë, të plagosur nga arma e zjarrit. Në ndërkohë, në Stacionin Policor në Rahovec janë dorëzuar dy persona meshkuj të moshës madhore e që dyshohet se janë të përfshirë në rast”, ka thënë ai.
Lidhur me këtë rast, sipas Elezajt, policia ka organizuar bastisje ku janë konfiskuar gjashtë armë të ndryshme dhe municion.
“Lidhur me rastin është organizuar operacion bastisje ku janë konfiskuar gjashtë armë të ndryshme dhe municion. Aktualisht, hetuesit policorë, në koordinim me prokurorin e shtetit, janë duke punuar për të ndriçuar dhe sqaruar të gjitha rrethanat që kanë të bëjnë me këtë rast”, ka thënë ai.