Prokuroria Themelore në Ferizaj, të hënën ka vazhduar me aksionin e tyre për verifikimin e ndërtimeve të objekteve në zonën e Brezovicës.
Lajmin për Portalin Dukagjini e ka konfirmuar prokurori i Porkurorisë Themelore në Ferizaj, Rasim Maloku, i cili bëri të ditur që ky aksion është në vazhdën e aksionit të kaluar.
Maloku tha se inspektorët e Ministrisë së Mjedisit janë duke kontrolluar në detaje për mënyrën e ndërtimeve në zonën e Brezovicës.
Maloku nuk ka bërë të ditur se do të ketë ndonjë arrestim, sipas tij, ky është vetëm aksion i verifikimit për të shikuar se a ka ndërtime që bien në kundërshtim me ligjet e Kosovës.
Aksion i ngjashëm i prokurorisë ishte zhvilluar edhe më datën katër gusht, ku inspektorët kishin dalë në terren për identifikimin e ndërtimeve në zonat e mbrojtura të parkut kombëtar.