Deputetja Duda Balje nga komuniteti boshnjak ka paditur për siç thotë ajo “shpifje” analistin Sadri Ramabaja për deklaratën e tij se kishte informacione që Balje ishte “takuar me Milan Radoiçiq më 28 shkurt”.

Balje përmes një postimi në ” title=””>Facebook ka bërë të ditur se sot(e premte) ka dorëzuar padinë ndaj Ramabajës në Gjykatën Themelore në Prishtinë.

“Siç kam paralajmëruar para dy javësh përmes profileve të mia në rrjete sociale, kam angazhuar përfaqësuesin tim të autorizuar Avokat Fanol Krasniqi të ngre padi për shpifje ndaj z. Sadri Ramabaja, lidhur me deklarimet e tij ndaj meje në emisionin “Debat Plus” në RTV “Dukagjini”, transmetuar më 7 prill 2025, deklarime këto që përbëjnë shpifje. Sot, më 25 prill 2025, kemi dorëzuar padinë në Gjykatën Themelore në Prishtinë. Shpresojmë që kjo padi të ndikojë sadopak në përmirësimin dhe ruajtjen e imazhit tim, i cili është cenuar nga deklarimet e tani të paditurit Ramabaja”.

Tutje deputetja Balje ka kërkuar përmbajtje në deklarime që dëmtojnë të tjerët.

“Lutemi që të gjithë qytetarët të përmbahen nga deklarime, posaçërisht deklarimet publike me të cilat mund të shqetësojnë apo dëmtojnë të tjerët sikur në rastin tim. Për mua personalisht kanë vlerë mendimet e gjithsecilit, dhe të gjitha mundohem t’i vlerësojë në kuadër të kapaciteteve të mia, natyrisht, përveç atyre që përmbajnë të pavërteta, janë të dëmshme apo janë dashakeqe. Deklarimet e tilla me përmbajtje propagandistitke kanë pasur ndikim që unë dhe familja ime të ndihemi të shqetësuar!”, ka shkruar ajo.

Lidhur me padinë e deputetes Balje, analisti Sadri Ramabaja për Dukagjinin ka thënë se është e drejtë e saj por se është i gatshëm të përballet në gjykatë.

“Është e drejtë e deputetes, por unë jam i gatshëm të përballem në gjykatë me fakte”, ka thënë Ramabaja.

Në fillim të prillit Ramabaja kishte deklaruar se ka informacione se Duda Balje ka pasur kontakt me Milan Radoiçiqin – ish-nënkryetar i Listës Serbe dhe udhëheqës i sulmit terrorist në Banjskë.

“Unë e kam pasë informacionin se ajo është takuar me Radoiçiqin më 28 shkurt, ose ka pasë telefonatë”, kishte thënë Ramabaja.