Gazetari Valon Syla ka reaguar pas sulmit fizik që i është bërë mbrëmjen e së martës, duke treguar se si ka ndodhur rasti, si dhe duke bërë të ditur se ka pësuar lëndime të rënda në kokë dhe dorën e majtë.
Syla, nëpërmjet një postimi në Facebook, ka pretenduar se sulmi mund të ketë lidhje me reagimet e tij për Hoxhë Mazllam Mazllami dhe ngjarjeve në Bashkësinë Islame të Kosovës (BIK).
Po ashtu, ai i ka përshkruar tre të dyshuarit si “fanatikë islamikë në dukje”.
“Sulmi me çdo gjasë ka të bëjë me reagimet e mia rreth ‘Mulla Mercedesit’ dhe ngjarjeve në BIK, që duket se nuk u ka pëlqyer fare, dhe kështu ka nxitur këtë komunitet të militantëve islamikë të organizojnë sulm fizik të paramenduar”, ka shkruar ai.
“Nuk e di a i ka porositur ndokush, por kjo mjaftoi që të pësoj lëndime të rënda në kokë, dhe në dorën e majtë”, ka shkruar tutje ai.
Ndër të tjera, ai ka thënë se reagimet e tij përpos që ishin të faktuara, kishin dhe doza të theksuara të humorit, e kjo sipas tij, nuk po pranohet nga komuniteti islamik.
Ndërsa, ende nuk ka ndonjë të arrestuar për sulmin që ka ndodhur mbrëmë ndaj gazetarit Syla.
Syla drejtpërdrejt nga ambientet e QKUK-së për Dukagjinin, mbrëmjen e së martës kishte treguar më saktësisht për sulmin ndaj tij,
Ai ishte duke folur kur gazetarit të RTV Dukagjinit iu pengua filmimi nga Policia e Kosovës. I njëjti dëgjohet duke thënë se është shtyrë fizikisht nga sigurimi i spitalit.