Ministria e Shëndetësisë ka njoftuar se po vazhdon zbatimi i Ligjit për Kontroll të Duhanit, në të gjithë territorin e vendit.
Sipas njoftimit, nga janari deri më 14 mars të këtij viti janë shqiptuar një mijë e 328 gjoba.
Në njoftim thuhet se tashmë gjobat për ata që thyejnë ligjin do të jenë prej një mijë deri tre mijë euro.
Mes tjerash, në njoftimin e Ministrisë thuhet se duhani vret më shumë se 8 milionë njerëz çdo vit në botë, duke përfshirë rreth 1.3 milionë joduhanpirës, të cilët janë të ekspozuar ndaj tymit të dorës së dytë.
“Në çdo 6.5 sekonda një njeri vdes në botë nga pasojat e duhanpirjes; Duhani vret gjysmën e përdoruesve të tij. Është shkaktari i dytë i vdekjeve në botë; Pirja e duhanit vlerësohet se shkakton: 67% të gjitha vdekjeve nga kanceri i mushkërive; 34% të vdekjeve nga sëmundjet kronike të frymëmarrjes dhe 8% të vdekjeve nga sëmundjet kardiovaskulare”, thuhet tutje në njoftimin e MSh-së.