Deputeti i Partisë Demokratike të Kosovës (PDK), Ferat Shala ka kritikuar qeverinë e Kosovës në seancën e Kuvendit të enjten në lidhje me gjendjen e minatorëve në Minierën e Trepçës.
Shala ka ironizuar me qeverinë se ku gjendet tash kur minatorët janë në ditën e tretë të grevës duke thënë se “i ka mashtruar keq”.
“Në Minierën e Trepçës po vazhdon sot dita e tretë e grevës. Minatorët në thellësi prej 700-800 metra sot kanë kërkesa elementare sociale, ekonomike e menaxheriale. Kanë kërkesë që të kenë siguri në punë, t’i gëzojnë pagat e meritueshme, të ndryshojnë një menaxhment joligjor dhe jofunksional. Të gjitha kërkesat e minatorëve i mbështesim sepse janë legjitime. I bëj thirrje Qeverisë që të reflektojë sepse situatën e kemi në përkeqësim të skajshëm”, ka thënë Shala.
Tutje ai ka pyetur se pse Qeveria “po ka frikë” të komunikojë me ta?
“Ku është Qeveria sot kur minatorët janë në grevë. Asnjë nga institucionet e shtetit nuk i ka vizituar. Pse Qeveria frikësohet të komunikojë me minatorët apo është e vetëdijshme se i ka mashtruar keq dhe thellë?”, ka vijuar ai.