Janë shkarkuar edhe dy drejtorë të Policisë së Kosovës pas rastit të përdhunimit të 11-vjeçares në Prishtinë.
Nga pozita e drejtorit të Policisë rajonale të Prishtinës është larguar Fahredin Verbovci ndërkaq, Shkëlzen Xhafa nga ajo e Shefit të Operativës për kryeqytet.
Ndërsa, për shkarkimet e tyre, njoftimi u bë nga kryeministri i Kosovës Albin Kurti, edhe pse shkarkimet bëhen nga menaxhmenti i Policisë. Kreu i Qeverisë, ka thënë se përgjegjësi duhet të mbajnë edhe Këshilli Gjyqësor i Kosovës (KGJK) e Këshilli Prokurorial i Kosovës (KPK).
Po ashtu, Kurti, në lidhje me rastin e dhunimit të 11-vjeçares në Prishtinë, ka thënë se është bërë kohë e gjatë me drejtësi selektive e të pabarabartë, barra e rëndë e së cilës, siç thotë ai bie mbi supet e viktimave, “kryesisht gra dhe vajza”.
Kreu i Qeverisë së Kosovës ka kërkuar edhe dorëheqje të tjera në lidhje me këtë rast.
Ai ka përmendur edhe dorëheqjen e drejtorit të Drejtoratit për Trajtimin e të Burgosurve dhe të Miturve në Shërbimin Korrektues të Kosovës, akt të cilin e ka quajtur moral.
“Organet e rendit arritën t’i arrestojnë personat e dyshuar për dhunimin e vajzës 11- vjeçare”, ka vijuar tutje.
Por, Kurti ka pyetur se “ku është morali i gjyqtarëve e prokurorëve?”
Shefi i ekzekutivit ka thënë se gjykatat nuk i gjykojnë rastet e dhunimeve në përputhje me ligjet në fuqi, që parashohin dënime prej më së paku 10 vjetësh për dhunë seksuale ndaj personit nën moshën 14 vjeç.
Për Kurtin, mosndëshkueshmëria ndaj dhunuesve, e edhe ndaj atyre që po i sjellin këto vendime, është e papranueshme.
“Shoqëria dhe shteti ynë, nuk mund të bartin koston e mospunës dhe papërgjegjësisë së prokurorëve e gjyqtarëve”, ka përfunduar Kurti.
Më 29 gusht, Ekrem Rexhepi bashkë me 4 persona të tjerë, përfshirë vëllain e tij, po dyshohen se për më shumë se 5 orë e kanë dhunuar një fëmijë 11-vjeçar në Prishtinë.
Ata të gjithë janë në paraburgim, derisa për këtë rast deri tani dorëheqje ka dhënë drejtori i Policisë, Samedin Mehmeti dhe Ali Gashi, drejtor i Drejtoratit për trajtimin e të burgosurve dhe të miturve.
Sipas aktgjykimit të Gjykatës Themelore të Prishtinës, Ekrem Rexhepi u dënua me burgim me kusht, për shkak se kishte tentuar ta sulmonte motrën dhe vëllain e tij.
RTV Dukagjini e ka siguruar aktgjykimin e datës 01.12.2020 përmes Ligjit për qasje në dokumente publike, e i cili është i redaktuar.