Ndeshja do të zhvillohet në Dublin, me fillim nga ora 20:45, ku Dardanët synojnë ta sigurojnë pozitën e dytë në grup dhe një vend në plejofin për promovim në Ligën A.

Kosova aktualisht renditet në vendin e dytë me gjashtë pikë, një më shumë se Irlanda, e cila ndodhet në pozitën e tretë me pesë pikë. Kjo do të thotë se përfaqësueses së Kosovës i mjafton edhe një barazim për ta ruajtur pozitën e dytë dhe për të siguruar kualifikimin në plejof.

Në anën tjetër, Irlanda është e detyruar të fitojë para tifozëve të saj nëse dëshiron ta kalojë Kosovën në renditjen e grupit dhe të vazhdojë garën për promovim në Ligën A.

Dardanët kanë arsye për të qenë optimistë, pasi në përballjen e parë mes këtyre dy përfaqësueseve, të zhvilluar në Prishtinë, triumfuan me rezultat 1:0. Golin e vetëm të asaj ndeshjeje e shënoi Vedat Muriqi në minutën e 83-të.

Përzgjedhësi Franco Foda do të ketë në dispozicion një skuadër me dy mungesa të rëndësishme. Edon Zhegrova nuk do të jetë pjesë e këtij takimi për shkak të lëndimit, ndërsa Veldin Hoxha është i pezulluar pas kartonit të kuq të marrë në ndeshjen e kaluar.

Kosova vjen në këtë përballje pas barazimit pa gola ndaj Izraelit, ndërsa Irlanda pësoi humbje 1:0 nga Austria.

Pavarësisht rëndësisë së ndeshjes dhe faktit se luan në udhëtim, Kosova e ka në dorë fatin e saj. Një barazim do të ishte i mjaftueshëm për ta ruajtur pozitën e dytë, ndaj Dardanëve u duhet një paraqitje e kujdesshme dhe përqendrim maksimal për ta arritur objektivin në Dublin.