Ministri i Brendshëm i Kosovës, Xhelal Sveçla, pasditen e së enjtes, ka kërkuar që sa më shpejt të sillen para drejtësisë përgjegjësit për plagosjen e policit në Kishën e Zllakuqanit.
Në një postim në Facebook, ministri Sveçla ka theksuar se zyrtari policor, Januz Veselaj, ishte plagosur gjatë shkëmbimit të zjarrit me personat e dyshuar.
“Gjatë reagimit në një tentim vjedhje në Kishën e Zllakuqanit në mëngjesin e sotëm, gjatë shkëmbimit të zjarrit me personat e dyshimtë është plagosur pjesëtari i Policisë së Kosovës Januz Veselaj. Përgëzoj zyrtarët policor për përgjigjen e shpejtë në rast pas marrjes së informatës dhe zyrtarin Januz Veselaj për reagimin profesional përkundër rrezikimit të jetës së tij”, ka shkruar Sveçla.
Po ashtu, Sveçla ka bërë të ditur se polici Veselaj pas tretmanit të nevojshëm në QKUK tashmë është liruar për në shtëpi.
“Nga Drejtori i Policisë jam njoftuar se zyrtari Veselaj pas tretmanit të nevojshëm në QKUK është liruar për në shtëpi. I uroj shërim dhe kthim të shpejtë në detyrë. Kërkoj nga njësitet përkatëse zbardhjen sa më të shpejtë të këtij rasti dhe sjelljen e kriminelëve para drejtësisë. Kushdo që në çfarëdo forme tenton të cënojë jetën apo pronën e qytetarëve tanë dhe shtetit tonë do të ballafaqohet me forcën e ligjit”, ka shkruar tutje ai në Fcaebook.