Bordi i Zyrës së Rregullatorit për Energji (ZRrE) ka vendosur që ta ulë çmimin e energjisë elektrike për tetë për qind për ata që shpenzojnë mbi blloktarifën prej 800 kilovatësh.
Tarifat e energjisë elektrike ishin rritur për 15% vitin e kaluar, dhe nga e diela e 31 marsit nuk janë më në fuqi.
Kryesuesi i Bordit të ZRRE-së, Ymer Fejzullahu ka thënë se ky është një lajm i mire dhe se zbritja ka ndodhur për shkak se importi me shumicë i energjisë elektrike ka pasur zbritje po ashtu.
“Në këtë mbledhje u vendos që të zbriten tarifat për konsumatorët familjarë që konsumojnë mbi 800 kilovatë në orë për një muaj në 8% dhe gjithë konsumatorët e tjerë biznesorë, industrial dhe ndriçimit publik me 3%. Ky është një lajm i mirë për gjithë ne, sidomos për konsumatorët që edhe në këtë vit do të kemi një zbritje përveç mbështetjeve tjera që u janë ofru nga institucionet e tjera gjatë vitit të kaluar por edhe këtë vit ZRrE-ja ka marrë parasysh kursimet që kanë ndodhë në sektor. Po ashtu duhet me theksu që importi i çmimit për energji me shumicë kanë pasur zbritje, dhe si rezultat janë reflektuar edhe te tarifat e konsumatorëve. Një nga kompanitë kryesore që ka shty në rritjen e tarifës ka qenë edhe çmimi me shumicë meqenëse kemi pasur tash zbritje te kostos së importit ajo është reflektu në tarifat e konsumatorit”, tha ai.
Tarifat e reja do të vlejnë për periudhën nga 1 prilli 2024.
Njoftimi i plotë:
KOMUNIKATË
Seanca e tretë (III) e Bordit të ZRRE në 2024
Ulje e tarifave të energjisë elektrike për konsumatorët fundor për vitin tarifor 2024
Bordi i Zyrës së Rregullatorit për Energji (ZRRE), në mbledhjen e tij të tretë (III) për këtë vit, të mbajtur sot, më 02 prill 2024, ka aprovuar tarifat me pakicë për konsumatorët fundor që furnizohen në kushte të shërbimit universal.
Rënia e çmimeve në tregjet e energjisë elektrike në Evropë ka ndikuar në kostot me shumicë të energjisë elektrike në Kosovë. Si rezultat i këtyre ndryshimeve, kostot e furnizimit me energji elektrike nga importi për konsumatorët fundor për vitin 2024 parashihen të jenë më të ulëta në krahasim me vitet e paraprake. Këto ndryshime kanë ndikuar në uljen e tarifave të energjisë elektrike për konsumatorët fundor si vijon:
Ulje e tarifave prej 8% për konsumatorët familjar për bllokun me konsum mbi 800kWh
Ulje e tarifave prej 3% për konsumatorët komercial dhe industrial
Bordi i Zyrës se Rregullatorit ka aprovuar edhe tarifat për vitin relevant tarifor 2024 për Operatorin e Sistemit, Transmisionit dhe Tregut (KOSTT) dhe Operatorin e Sistemit të Shpërndarjes (KEDS).
Në këtë seancë, Bordi ka shqyrtuar rezultatet e fituara nga vlerësimi i koncentrimit të tregut të energjisë elektrike në Kosovë përmes indeksit HHI (Herfindahl–Hirschman Index) për vitin 2023, i cili tregon qartë se kemi të bëjmë me një përqendrim të lartë në tregun e energjisë elektrike, nga ku shihet mungesa e furnizuesve aktiv.
Bazuar në rezultatet e këtij raporti, Bordi ka vendosur që Obligimi i Shërbimit Universal për dy vitet e ardhshme t’i ngarkohet KESCO-s.
Të gjitha vendimet e Bordit të ZRRE do të publikohen në faqen elektronike zyrtare të ZRRE www.ero- ks.org.