Ministrja e Drejtësisë, Albulena Haxhiu, ka thënë se pas djegies së dy zyrave të Institutit të Mjekësisë Ligjore në Prishtinë, është njoftuar se nuk ka pasur djegie të mbetjeve mortore, të arkivës apo të mostrave.
“Ekipet e zjarrfikësve, policia, prokuroria menjëherë kanë shkuar në vendin e ngjarjes. Nga vlerësimet fillestare nuk ka pasur djegie ose dëmtim të mbetjeve mortore, arkivës së IML dhe mostrave”, tha ajo.
Sipas saj, “Ekipet e forenzikës dhe ekspertët e zjarrit dhe të elektroteknikës janë ende duke e kryer punën e tyre, me qëllim që të dihen shkaqet e zjarrit. Policia dhe Prokuroria po ashtu janë duke bërë punën e tyre”.
Lexo edhe: Zjarri në IML, Prokuroria: Kemi lëshuar disa autorizime për ekzaminime nga vendi i ngjarjes
Haxhiu theksoi se me të drejtë qytetarët e Kosovës mund të jenë të shqetësuar me situatën e fundit në IML, por sipas saj, pa u ditur shkaktari nuk mund të japë më shumë informacione.
“Për shkak të atyre që kanë ndodhur në IML ndër vite, me të drejtë qytetarët mund të jenë të shqetësuar lidhur me këtë, mirëpo pa kuptuar shkakun e zjarrit nuk mund të japim informacione më shumë”, tha ajo.
Në fund, Haxhiu tha se kur të kenë më shumë informacione do t’i ndajnë edhe me publikun.
Zjarr në objektin e Institutit të Mjekësisë Ligjore, nuk ka të lënduar