Ministri për Punë, Familje dhe Vlerat e Luftës Çlirimtare, Andin Hoti, ka bërë të ditur se Qeveria e Kosovës ka miratuar Programin për Mbrojtjen e Konsumatorëve të Cenueshëm të Energjisë Elektrike 2026–2027.
Hoti ka njoftuar se përmes këtij programi do të ndahen 15 milionë euro për subvencionimin e faturave të energjisë elektrike për familjet që kanë më së shumti nevojë për mbështetje.
Sipas tij, në ditët në vijim do të nënshkruhet vendimi që përcakton kushtet dhe kriteret për përfitim, pas së cilit pritet të hapet edhe thirrja për aplikim.
“15 milionë euro mbështetje. Drejtpërdrejt në faturat e familjeve”, ka shkruar Hoti.
Ai ka theksuar se Kosova ka marrë obligime edhe në kuadër të procesit të integrimit evropian dhe zbatimit të Planit të Rritjes për Ballkanin Perëndimor, i cili parasheh krijimin e mekanizmave për identifikimin dhe mbështetjen e konsumatorëve të cenueshëm të energjisë.
Hoti ka përmendur gjithashtu krijimin dhe mirëmbajtjen e një regjistri funksional të konsumatorëve të cenueshëm.
Në të njëjtin njoftim, ministri Hoti ka uruar Presidenten e re të Kosovës, Justina Shiroka-Pula, duke shprehur gatishmërinë për bashkëpunim institucional në çështjet që lidhen me interesin e vendit dhe mirëqenien e qytetarëve.