Të martën e 19 prillit janë bërë nëntë vjet qëkur është nënshkruar marrëveshja e parë në mes të shtetit të Kosovës dhe Serbisë. Në vitin 2013, Hashim Thaçi, atëherë kryeministër i Kosovës dhe ai i Serbisë, Ivica Daçiq, kishin nënshkruar një marrëveshje 15 pikëshe në kuadër të normalizimit të marrëdhënieve në mes të të dyja vendeve.
Një ndër pikat e marrëveshjes ishte një që fliste për formimin e një asociacioni të komunave me shumicë serbe dhe po ashtu, shpërbërjen e strukturave paralele në pjesën veriore të vendit.
Sipas marrëveshjes, strukturat ilegale serbe që vepronin në veri të Kosovës do të integroheshin brenda kornizës së Policisë së Kosovës dhe pagat do të jepeshin vetëm nga Policia e Kosovës.
Autoritetet gjyqësore do të ishin të integruara dhe do të operonin brenda kornizës ligjore të Kosovës.
Gjykata e Apelit në Prishtinë do të krijonte një panel, në të cilin, shumica do të ishin gjykatës të nacionalitetit serb të Kosovës. Sipas marrëveshjes, ata do të merreshin me të gjitha rastet e komunave me shumicë serbe.
Marrëveshja përfshinte një pikë që fliste për zgjedhjet komunale në komunat e veriut, të cilat do të organizoheshin në vitin 2013, me ndihmën e OSBE-së, në përputhje me ligjet dhe Kustetutën e Kosovës, dhe me standardet ndërkombëtare.