Një tjetër institucion me rëndësi, pritet që së shpejti të mbes pa mandat të plotë.
Anëtarëve të Komisionit Qendror të Zgjedhjeve, iu skadon mandati edhe një muaj, e tashmë procedura ka nisur.
Partitë politike kanë konfirmuar se dje Presidentja Osmani u është drejtuar me shkresa duke iu kërkuar propozimet dhe se për këtë kanë kohë një javë.
Nga Zyra për Media e Lëvizjes Vetëvendosje thanë për televizionin se ‘emrat do t’i dërgojnë shumë shpejt’, pa treguar se kush janë ata.
“Pas çdo procesi zgjedhor, emërohen anëtarët e KQZ sipas fuqisë politike të subjekteve. Për këtë proces zgjedhor ende nuk është kryer emërimi sepse ka më pak se një muaj që u certifikuan zgjedhjet”.
Nga PDK-ja thanë për Dukagjinin synim i tyre është të ‘propozojmë njerëz të përgjegjshëm dhe kredibilë, por as ata nuk i bënë publike.
“Ende jo. Kërkesën e Presidentes e kemi pranuar dje lidhur me caktimin e emrave të anëtarëve të Partisë Demokratike të Kosovës në Komisionin Qendror të Zgjedhjeve. Sipas kësaj kërkese, është paraparë një afat prej një jave për dërgimin e propozimeve. Sot kanë nisur diskutimet dhe konsultimet brenda strukturave të partisë dhe, brenda këtij afati ligjor, do t’i dërgojmë emrat e kandidatëve që i konsiderojmë më përfaqësues, me integritet profesional dhe me përvojën e nevojshme për ta përfaqësuar denjësisht PDK-në në KQZ. Synimi ynë është që në këtë institucion të rëndësishëm të propozojmë njerëz të përgjegjshëm dhe kredibilë, që kontribuojnë në ruajtjen e standardeve demokratike dhe në integritetin e proceseve zgjedhore në vend”.
Kurse, nga LDK-ja nuk janë përgjigjur për këtë çështje kurse pyetjeve rreth kësaj nuk i janë përgjigjur as nga Zyra e Presidentes Vjosa Osmani.
Nga Instituti Demokratik i Kosovës thonë se procedurat për emërimin e anëtarëve të rinj në KQZ kanë nisur shumë vonë.
“Një proces i tillë është duke u bërë më vonesë dhe është duke u bërë pasi që e ka shpallur dekretin për shpërndarjen e Kuvendit, gjë që të cilën proces të emërimit është dashur ta bëjë shumë më herët sesa tash”, ka thënë Naim Jakaj nga KDI.
Hulumtuesi i këtij instituti, Naim Jakaj, thotë se subjektet duhet të veprojnë shpejt.
“Partitë politike duhet me nguti që të dërgojnë këta emra sepse ato e dinë personin të cilin duhet ta dërgojnë ose e dërgojnë personin që ka qenë më parë, i cili nuk mund të jetë më shumë sesa tre mandate”, ka shtuar Jakaj.
Në bazë të zgjedhjeve të fundit, Vetëvendosjes dhe PDK-së u takojnë nga dy anëtarë në KQZ, LDK-së një, AAK-së një, si dhe nga një anëtar komunitetit serb dhe atij turk.