Lidhja Demokratike e Kosovës (LDK), ka kërkuar themelimin e komisionit për hetim parlamentar në lidhje me energjinë.
Kryetari i kësaj partie, Lumir Abdixhiku, përmes një statusi në Facebook, ka thënë se refuzimi i një hetimi të tillë, tregon për frikën e opozitës “rreth së vërtetës që megjithatë do të zbardhet herët apo vonë”.
Ai ka akuzuar pushtetin se po tregohen arrogantë, duke i përdorur numrat që i kanë në parlament.
“Ky refuzim hetimi, është shenjë frike e pushtetit rreth së vërtetës që megjithatë do të zbardhet herët apo vonë. Sa më i fortë refuzimi, aq më i domosdoshëm bëhet hetimi. Dhe sa më i domosdoshëm hetimi, aq më e drejtë bëhet kërkesa jonë për të”, ka shkruar Abdixhiku.
Tutje, Abdixhiku, ka potencuar se konstruktuvitetin e partisë së tij, partia në pushtet e ka marrë si të mirëqenë. Sipas tij, është tejet i nevojshëm themelimi i një komisioni i cili do t’i hetonte sipas tij parregullësitë që kanë ndodhur në sektorin e energjisë.
“Kjo sjellje e jonë duket se është marrë si e mirëqenë. Sot, s’ka interes tjetër më madhor se sa hetimi i shtrenjtimit enorm të faturave që prekin secilën shtëpi e familje në Kosovë – e zbardhja e fatit të qindra milionave të shpërndara si subvencion. Kushdo që frigohet nga ky hetim, ka se çfarë të tregojë”, tha Abdixhiku.
Në fund, kryetari i LDK-së, bëri të ditur se partia që ai e drejton nuk do ta përkrah ansjë nismë tjetër parlamentare, nëse nuk themelohet komisioni hetimor për energji.