Presidenti i Republikës Srpska, Millorad Dodik, ka reaguar pas abstenimit të ambasadorit të BeH-së në Këshillin e Evropës kur Komiteti Ministror i KiE-së mori vendimin që t’ia përcjellë Asamblesë Parlamentare të Këshillit të Evropës kërkesën për anëtarësim të Kosovës.
Ai ka theksuar se ambasadori i Bosnjë-Hercegovinës ka votuar pa procedurën dhe pëlqimin e Presidencës së BeH-së në kundërshtim me procedurat e përcaktuara.
“Në Bosnjë dhe Hercegovinë politikën e jashtme e vendos Presidenca, kështu që ai vendim kërkonte edhe pëlqimin e të tjerëve. Vota e ambasadorit është e pasaktë dhe e papranueshme”, ka thënë Dodik, shkruan Rtv.rs.
Sipas tij, ata që mbrojnë një qasje të tillë kërkojnë që Serbia të respektojë integritetin territorial të Bosnje-Hercegovinës dhe sapo t’u jepet mundësia, ata janë të gatshëm të shkatërrojnë integritetin e Serbisë.
“Kjo është e papranueshme. Republika Srpska nuk e njeh pavarësinë e Kosovës”, shtoi ai.
Ministrja e Punëve të Jashtme e Kosovës, Donika Gërvalla, ka njoftuar të hënën se Komiteti Ministror i Këshillit të Evropës, ka marrë vendim që t’ia përcjellë Asamblesë Parlamentare të Këshillit të Evropës kërkesën për anëtarësimin e Kosovës.
Sipas Gërvallës, Komiteti që përfaqëson 46 shtetet anëtare të KE-së, mori këtë vendim në një mbledhje të jashtëzakonshme, me më shumë se 2/3 e votave.
Kosova ka aplikuar për anëtarësim në Këshillin e Evropës më 12 maj 2022.
Këshilli i Evropës, organizata më e vjetër evropiane që merret me zhvillimin e demokracisë dhe të drejtat e njeriut, ka procedura të caktuara për pranimin e anëtarëve të rinj. Këto procedura kalojnë përmes Këshillit të Ministrave dhe Asamblesë Parlamentare, ku marrin pjesë deputetët nga parlamentet e shteteve anëtare.
Lidhur me këtë vendim pati 33 vota për, shtatë kundër dhe pesë abstenime.
“Për shtetin tonë të ri, vendimi i sotëm përbën një hap historik, ndoshta më të rëndësishmin pas pavarësisë sonë. Me këtë vendim përmbyllet një etapë e rëndësishme drejt anëtarësimit të plotë”, shkroi Gërvalla në Facebook, duke shtuar se “mbetet edhe shumë punë për t’u bërë”.
Me 33 vota pro, shtatë kundër dhe pesë abstenime u miratua kërkesa e Kosovës.
Pro anëtarësimit të Kosovës votuan shtetet si : Shqipëria, Andorra, Austria, Belgjika, Bullgaria, Kroacia, Republika Çeke, Danimarka, Estonia, Finlanda, Franca, Gjermania, Islanda, Irlanda, Italia, Letonia, Lihtenshtajni, Lituania, Luksemburgu, Malta, Monako, Mali i Zi, Holanda, Maqedonia e Veriut, Norvegjia, Polonia, Portugalia, San Marino, Sllovenia, Suedia, Zvicra, Turqia dhe Mbretëria e Bashkuar.
Ndërkaq vota kundër e Hungarisë së drejtuar nga Viktor Orban, shtet ky që e ka njohur shtetësinë e Kosovës, ishte befasia e kësaj ngjarjeje.
Pos Hungarisë kundër votuan edhe Spanja, Rumania, Qipro, Gjeorgjia, Azerbajxhani e Serbia.
Kanë abstenuar: Greqia, Sllovakia, Ukraina e Bosnja.
Ndërkaq shteti i Armenisë nuk ka marrë pjesë fare në votim.