Policia e Kosovës ka dërguar në ndalim 48 orësh një person në Gjilan, nën dyshimin se kishte mbjellë rreth 28 bimë të shkurres Kanabis Sativa, në gjatësi rreth 3 metra afër shtëpisë së tij.
Arrestimi i të dyshuarit erdhi pasi policia kishte kryer bastisje në shtëpinë e të dyshuarit nga fshati Mogillë – Kllokot, ku gjatë kësaj bastisje rreh 100 metra larg shtëpisë së tij, është gjetur një serrë (kopsht), në të cilën i njëjti dyshohet se kishte mbjellë bimët narkotike.
“Pas njoftimit të prokurorit kompetent dhe urdhrit verbal të gjyqtarit të procedurës paraprake kanë kryer një bastisje në shtëpinë e të dyshuarit mashkull kosovar nga fshati Mogillë – Kllokot, ku gjatë kësaj bastisje rreh 100 metra larg shtëpisë së tij, është gjetur një serrë (kopsht), në të cilën i njëjti dyshohet se kishte mbjellë rreth 28 bimë të shkurres së bimës Kanabis Sativa, në gjatësi rreth 3 metra”, thuhet në njoftimin e policisë.
Lidhur me rastin në vendin e ngjarjes kanë dalë Njësia e Forenzikës për procesim të vendit të ngjarjes, ku edhe në cilësi të provave materiale “janë sekuestruar 3 bimë (mostra), ndërsa me urdhër të prokurorit të shtetit sasia tjetër është asgjësuar në vendin e ngjarjes përmes procesit të djegies, ku edhe është bërë procesverbali mbi shkatërrimin e bimëve narkotike të llojit Kanabis Sativa”.
Njësitet përkatëse policore po vazhdojnë hetimet në lidhje me këtë rast.