Policia e Kosovës ka njoftuar se është arrestuar shoferi i kamionit i cili dyshohet se ka shkaktuar aksidentin me fatalitet, i cili ka ndodhur mesditën e së hënës në magjistralen Klinë- Gurakoc, në fshatin Krushevë e Vogël.
Në raportin 24 orësh të policisë bëhet e ditur se i njëjti është dërguar në mbajtje.
Ndërsa, viktimë e këtij aksidenti është një 35-vjeçar, i cili, sipas policisë, është dërguar në Institutin e Mjekësisë Ligjore për obduksion.
“Klinë / 15.01.2024 – 12:55. Ka ndodhur aksident trafiku në mes një veture dhe një kamioni. Si pasojë, lëndime vdekjeprurëse ka pësuar vozitësi i veturës. Me vendim të prokurori,t trupi i pajetë i viktimës është dërguar në IML për obduksion, ndërsa vozitësi i kamionin mashkull është arrestuar dhe dërguar në mbajtje”, thuhet në raport.
Një i vdekur në një aksident në Krushevë të Klinës
Policia e Kosovës ka bërë të ditur se një person ka vdekur si pasojë e një aksidenti në trafik që ka ndodhur në Krushevë të Vogël të Klinës.
Këtë e ka konfirmuar zëdhënësi i Policisë së Kosovës për rajonin e Pejës, Fadil Gashi.
“Rreth orës 12:52, ka ndodhur një aksident në magjistralen Klinë – Gurakoc, në fshatin Krushevë e Vogël. Në aksident kanë qenë të përfshira dy automjete, një veturë dhe një kamion. Për vozitësin e automjetit, mjeku kujdestar e ka konfirmuar vdekjen, ndërsa vozitësi i kamionit ka pësuar lëndime”, ka thënë Gashi.