Për muaj pati mungesë të disa loteve të penjëve kirurgjik, të cilët pacientët u detyruan t’i blejnë vet.
Më pas furnizimi qe i pjesshëm dhe situata u përsërit, siç ndodhi edhe me lotet e stendave.
Po këto nuk ishin problemet e vetme, pasi që pacientët që shërbimet mjeksore i marrin në Qendren Klinike e Universitare të Kosovës u përballen edhe me mungesa të barnave tjera.
Më të shpeshtat e të kushtueshmet ishin ato në Klinikën e Onkologjisë që patën kosto edhe deri në 5 mijë euro.
Kësisoj, për t’i evituar këto probleme klinikave të QKUK-së iu bë një auditim i brendshëm dhe raporti evidentoi hallkat ku kishte ngecje.
“Raporti i auditimit ka evidentuar mangësi në planifikimin, furnizimin, menaxhimin dhe monitorimin e barnave dhe materialeve medicinale. Ndër çështjet e evidentuara janë planifikimi pa mbulim të qartë financiar, mospërputhjet ndërmjet planifikimit dhe hyrjeve, inicimi i kontratave pa u bazuar në gjendjen reale të stokut, si dhe mangësitë në gjurmueshmërinë dhe mbikëqyrjen e procesit të furnizimit”.
Për shkeljet që u evidentuan, ministri i Shëndetësisë, Arben Vitia pati një paralajmërim.
“Në mbledhjen e fundit të bordit ka kërkuar që të meren masat e nevojshme dhe janë përcaktuar edhe afatet kohore për marrjen e masave edhe atyre masave disiplinore aty ku ka nevojë por sidomos masave të përmirësimit aty ku ka nevojë pra për përmirësimin e të gjeturave”, ka thënë Arben Vitia, ministër i Shëndetësië.
Gazetari Bujar Vitija, që mbulon sektorin e shëndetësisë, e konsideron si inkurajues raportin.
“Është e rëndësishme që të kërkohet llogaridhënie nga menaxhmenti i SHKSUK-së dhe QKUK-së pse nuk janë krijuar kushte deri më tani që së paku të minimizohen këto vonesa dhe të mos ketë zgjatje të mungesës së produkteve bazike si penj kirurgjik e deri tek barnat për sëmundje të rënda”, ka thënë Bujar Vitija, gazetar i shëndetësisë.
Ankesat për mungesen e barnave i pranuan edhe Shoqata e Pacientëve të cilët kërkojnë të ndërmeren hapa.
“Duhet të ketë masa edhe ndaj operatorëve ekonomikë që kanë qenë të papërgjegjshëm në përmbushjen e obligimeve të tyre. Po ashtu, është e rëndësishme që institucionet të publikojnë vendimet për masat e marra, qoftë ndaj përgjegjësve brenda institucioneve, ndaj operatorëve ekonomikë, apo masat e tjera të ndërmarra për korrigjimin e problemeve në furnizim”.
Sipas afateve të përcaktuara, brenda 15 ditëve, drejtori i përgjithshëm duhet t’i raportoj bordit drejtues për rastet e referuara dhe masat e ndërmarra.