Bashkimi Evropian ka dënuar vendimin e Republikës Sërpska të Bosnje e Hercegovinës dhe autoriteteve të saj, për t’i dhënë presidentit rus, Vladimir Putin “Urdhrin e Republikës Sërpska”.
Kështu ka thënë zëdhënësi i Bashkimit Evropian, Peter Stano, në një konferencë të rregullt për shtyp.
“Në Bashkimin Evropian nuk ka vend për nderimin dhe shpërblimin e politikanëve që urdhërojnë shkatërrimin e një vendi fqinj dhe vrasjen e popullit të tij. Kjo duhet të jetë e qartë për të gjithë dhe ky vendim i udhëheqjes së Republikës Sërpska është për keqardhje dhe i gabuar”, ka thënë Stano.
Stano ka kujtuar se presidenti rus është drejtpërdrejt përgjegjës për agresionin e paligjshëm në Ukrainë, dhe se civilët ukrainas po vriten e po shkatërrohet infrastruktura civile ukrainase, shkruan REL.
Presidenti i entitetit të Bosnje dhe Hercegovinës, Republikës Sërpska, Milorad Dodik, ndau çmimin më 8 janar, për siç u tha “kujdesin patriotik dhe dashurinë [e Putinit] për Republikën Sërpska”.
Autoritetet e Republikës Sërpska festojnë 9 janarin, datën kur në Sarajevë në vitin 1992, Kuvendi i atëhershëm i popullit serb, miratoi Deklaratën për Shpalljen e Republikës së Popullit Serb të Bosnje e Hercegovinës si entitet i pavarur brenda Bosnjë-Hercegovinës.
Qëllimi ishte që ajo pjesë e Bosnjë-Hercegovinës t’i aneksohej Jugosllavisë, e cila në atë kohë po shpërbente.