Fatmir Çollaku, njohës i Sigurisë, në emisionin FIVE të RTV Dukagjinit ka komentuar sulmimin dhe dhunën ndaj liderit opozitar serb, Nikola Sanduloviq, të ushtruar nga Shërbimi Sekret i Serbisë (BIA), pasi ky i fundit ka bërë homazhe në Prekaz te varri i Adem Jasharit, ku edhe ka kërkuar falje publike për krimet e Serbisë në Kosovë.
Sipas Çollakut, ky sulm ka portretizuar shumë mirë se çfarë është pushteti i presidentit të Serbisë, Aleksandar Vuçiq.
“Ky sulm tregon konceptin e politikanëve serbë të Vuçiqit, që nënkupton në kërcënimin e zërave ndryshe deri në likuidimin e tyre”, ka thënë Çollaku.
“Tregon atë diktaturën ultra nacionaliste serbe, e cila me çdo kusht dhe mjet përpiqet me ndrydh edhe mi ngulfat zërat ndryshe opozitar në Serbi. Jetësim në praktikë i konceptit diktatorial që është në fuqi në Serbi në krye me Vuçiqin”, ka shtuar ai.
Më tej, Çollaku ka përfunduar duke thënë se këto ngjarje për të kanë qenë befasi, pasi sipas tij, në Serbi mbizotëron neodiktatura.
Dhuna ndaj Sandullviqit është mesazh
Ish-ushtaraku i FSK, Hysen Gecaj ka thënë se rrahja e Sandullviqit, ka pasur qëllim të dërgoi mesazh për qytetarët dhe politikanët serbë se çdo kush që mendon ndryshe do të përballet me një gjë të tillë.
“Kjo ngjarje që ka ndodhur është dhe një mesazh për ata qytetarë dhe politikanë që kanë një mendim ndryshe nga Qeveria e Serbisë. Edhe ky mesazh është se secili serb duhet t’i nënshtrohet diktatit të presidentit të Serbisë Aleksandar Vuçiqit”, ka thënë Gecaj.
Ai ka përfunduar duke thënë se Vuçiqi nga pushteti autoritar ka kaluar në premisa të diktaturës pasi sipas Gecajt, presidenti serb ka ambiciet dhe synimet që “vetëm zëri tij dhe vendimet e tij të shihen si përfundimtare.