Avokati Tomë Gashi pas seancës gjyqësore për rastin e vrasjes së 18-vjeçarit, Lulzim Fejzullahu nga Podujeva, ka thënë se një dëshmitar është dëgjuar, ndërsa tjetri ka mbetur për seancën e radhës.
Seancat e radhës pritet të mbahen më 15 dhe 16 prill.
Seanca ka qenë e mbyllur dhe sipas Gashit gjyqtarja e rastit ka urdhëruar që të mos shpalosen detaje më tutje në lidhje me gjykimin.
“Seanca ka përfunduar, në këtë seancë është dëgjuar një dëshmitar. Gjyqtarja ka urdhëruar që të mos shpalosen detaje më tutje. Seancat e radhës janë caktuar për këtë muaj, më 15 dhe 16 prill”, ka thënë Gashi.
Ndryshe, sot u mbajt e mbyllur seanca gjyqësore për rastin e 18-vjeçarit, Lulzim Fejzullahu, i cili u rrah për vdekje nga dy të mitur më 14 janar.
Më 1 prill, Prokuroria Themelore në Prishtinë ka ngritur aktakuzë ndaj dy të dyshuarve për vrasjen e Fejzullahut.
Dy të dyshuarve u është ngarkuar vepra penale “Vrasje e Rëndë” në aktakuzë.
Nga Prokuroria Themelore në Prishtinë e kishin konfirmuar për Dukagjinin se më 25 mars është paraqitur propozim për shqiptimin e dënimit me burgim për të miturit për shkak të veprës penale “Vrasja e rëndë”.
“Prokuroria Themelore në Prishtinë, më 25.03.2024, ka paraqitur Propozim për shqiptimin e dënimit me burgim për të miturit, ndaj dy personave (të mitur), për shkak të veprës penale ‘Vrasja e rëndë’ në bashkëkryerje, pranë gjykatës kompetente”, kështu ka thënë Laureta Ulaj, zëdhënëse e Prokurorisë Themelore në Prishtinë.
Deri më tani, dy të akuzuarit janë duke qëndruar në paraburgim deri në një vendim tjetër të Gjykatës.
18-vjeçari kishte vdekur në Emergjencën e QKUK-së disa ditë pasi ishte rrahur.
Policia fillimisht e raportoi vrasje në tentativë dhe therje me thikë, e në Emergjencë konstatuan vdekjen e tij nga lëndimet në kokën e viktimës, të marra nga shkopi i bejsbollit.
Për këtë raportim, Inspektorati Policor i Kosovës kishte iniciuar hetim.