Kandidati i Partisë Demokratike të Kosovës(PDK) për kryeministër të Kosovës, Bedri Hamza i shoqëruar nga zyrtarë të lartë PDK-së kanë qëndruar sot në Meje të Gjakovës në përvjetorin e 25-të të gjenocidit serb që u krye mbi qindra shqiptarë të kësaj ane.
Kryerësit e kësaj masakre ende janë të lirë dhe nuk kanë dhënë asnjëherë llogari për krimet e kryera në Mejë thuhet në postimin e PDK-së.
“Gjenocidi i orkestruar i shtetit serb në Kosovë, vjen e shfaqet në mënyrën e tij më barbare në Mejë të Gjakovës, me 27 prill të vitit 1999, duke lënë pas vetes 376 persona të masakruar. Pleq, burra e fëmijë – të vrarë në gjakftohtësi dhe me paramendim. Të gjithë civilë e të pafajshëm, 36 djem ishin nën moshën 18 vjeç. Trupat e 13 viktimave ende nuk janë gjetur”, shkruan faqja zyrtare e PDK-së në Facebook.
“Dhjetëra oficerë të lartë serbë ishin të përfshirë, direkt ose indirekt, apo ishin në dijeni për këtë masakër. Të gjithë ata janë të lirë dhe nuk kanë dhënë asnjëherë llogari për krimet e kryera në Mejë dhe vende tjera të Kosovës”, thuhet në këtë postim.
Meja është e vërteta e Serbisë. Meja është e vërteta e luftës së Kosovës. Meja flet për viktimën dhe agresorin – më fuqishëm dhe më drejtë se cilado gjykatë.
“Kosova nuk do të harrojë asnjëherë. Lavdi e përjetshme martirëve të atdheut tonë!”, shkruan PDK.
Gjatë ditës edhe presidentja e Kosovës, Vjosa Osmani ka vizituar Mejën e shoqëruar nga kryeministri Albin Kurti.