Ushtruesja e detyrës së Presidentes së Kosovës, Albulena Haxhiu, ka kujtuar Adem Beqirin, Idriz Rrecajn dhe Salih Mëziun, të cilët janë identifikuar pas 27 vjetësh kërkimi nga familjet e tyre.

Haxhiu ka thënë se në Qendrën e Kulturës “Rexhep Mitrovica” në Mitrovicë është bërë nderimi për tre viktimat, ndërsa familjet e tyre më në fund kanë marrë përgjigje për fatin e të afërmve të tyre.

AD PLACEHOLDER

Sipas saj, më 19 prill 1999, forcat serbe rrëmbyen 23 civilë shqiptarë nga Skenderaj dhe Mitrovica, të njohur si “Grupi i Intelektualëve”.

“Ata u ndaluan në Melajë, në Kalludër të Vogël, u keqtrajtuan, u ekzekutuan dhe trupat e tyre u fshehën për të zhdukur gjurmët e krimit”, ka shkruar Haxhiu.

Ajo ka bërë të ditur se gërmimet në Kalludër dhe Jabukë, së bashku me analizat e ADN-së, kanë konfirmuar identitetin e Idriz Rrecajt, Adem Beqirit dhe Salih Mëziut.

“U gjetën në varre pa emër, por tani do të prehen me emrat e tyre dhe familjet do të kenë një vend ku t’i kujtojnë e t’i nderojnë”, ka shkruar Haxhiu.

Ushtruesja e detyrës së Presidentes ka vlerësuar punën e të gjithë atyre që kanë kontribuar në gjetjen dhe identifikimin e tyre, ndërsa ka bërë thirrje që kërkimi të vazhdojë edhe për 20 anëtarët e tjerë të grupit dhe personat e tjerë të zhdukur gjatë luftës.

“Kërkimi duhet të vazhdojë për 20 anëtarët e tjerë të grupit dhe për çdo person të zhdukur me dhunë. Familjet meritojnë të vërtetën, ndërsa për krimet e luftës duhet të ketë drejtësi”, ka shkruar ajo.

Haxhiu ka bërë të ditur se familjeve Beqiri, Rrecaj dhe Mëziu ua ka shprehur ngushëllimet e saj.

“I përjetshëm qoftë kujtimi i Adem Beqirit, Idriz Rrecajt dhe Salih Mëziut, si dhe i të gjithë të rënëve dhe të vrarëve për lirinë e Kosovës!”, ka përfunduar Haxhiu.