Nënkryetari i Lidhjes Demokratike të Kosovës (LDK), Lutfi Haziri ka thënë se çështja e Asociacionit çështje është kompetencë dhe përgjegjësi kushtetuese vetëm e institucioneve të Republikës së Kosovës, në radhë të parë e ekzekutivit.
Tashmë, në Ambasadën amerikane në Prishtinë, ka përfunduar takimi, në të cilin, është diskutuar për Asociacionin e komunave me shumicë serbe, ndërsa të ftuar ishin zyrtarë nga Presidenca, zyrtarë qeveritarë, liderë partiakë, diplomatë dhe anëtarë të shoqërisë civile. Nga radhët e LDK-së, Haziri ka bërë të ditur se ishte pjesë e takimit me ç’rast, i njëjti thotë se ka konfirmuar mbështetjen për procesin e dialogut të ndërmjetësuar nga BE-ja.
“Me ftesë të ambasadorit të SHBA-së në Kosovë, shkëlqesisë së tij Jeffrey Hovenier, sot kam marrë pjesë në emër të LDK-së në takim në të cilin konfirmova mbështetjen për procesin e dialogut të ndërmjetësuar nga BE-ja, me përfshirjen e plotë të SHBA-së. Orientimet e LDK-së për një marrëveshje përfundimtare, ligjërisht të obligueshme, dhe me njohjen reciproke në thelb të saj, mbesin të pandryshueshme”, ka deklaruar Haziri.
Krahas kësaj, i njëjti ka thënë se LDK-ja vlerëson që Asociacioni i Komunave me Shumicë Serbe mbetet një kompetencë në radhë të parë e Qeverisë së Republikës së Kosovës dhe istitucioneve të saj.
“Në lidhje me Asociacionin, LDK-ja vlerëson se kjo çështje është kompetencë dhe përgjegjësi kushtetuese vetëm e institucioneve të Republikës së Kosovës, në radhë të parë e Qeverisë”, ka deklaruar ai.
Themelimi i Asociacionit është përmendur në propozimin e fundit evropian, një plan disapikësh i ofruar nga zyrtarët amerikanë e evropianë për Kosovën dhe Serbinë.
Kryeministri i Kosovës, Albin Kurti, ka deklaruar se e respekton konfidencialitetin e bisedimeve, ndërsa për Asociacionin ka shtuar se ka insistim të ndryshëm ndërkombëtar për zbatimin e marrëveshjes. Sipas tij, marrëveshja për Asociacionin, sipas draftit fillestar, nuk e ka kaluar testin e Gjykatës Kushtetuese të Kosovës.
Lidhur me këtë takim, vetë Kryeministri i Kosovës, Albin Kurti kishte deklaruar se nuk është ftuar.
Ndryse, Fondacioni Friedrich Ebert-Stiftung në Prishtinë, ka prezntuar propozimin e draft-statutit të Asociacionit të komunave me shumicë serbe.
Radio Televizioni Dukagjini ka siguruar draftin e Asociacionit, i cili është hartuar si propozim nga fondacioni gjerman “Fridrih Ebert Shtiftung”.
Presioni i shtuar dukshëm për themelimin e Asociacionit të Komunave me Shumicë, ka rezultuar me hartimin e një drafti të statutit si propozim për këtë mekanizëm.
Drafti është hartuar nga Fondacioni gjerman për social demokraci “Friedrich Ebert Stiftung”.
Ai përmban 18 nene. Që në nenin e parë theksohet se Asociacioni është një entitet legal i themeluar në bazë të Kushtetutës dhe sistemit ligjor të Republikës së Kosovës.