Deputeti i Lidhjes Demokratike të Kosovës (LDK), Avdullah Hoti, ka kritikuar qeverinë për Projektligjin e ri për sigurime shëndetësore, duke deklaruar se është vetëm një kopje e ligjit ekzistues nga viti 2014.
Sipas Hotit, shumica e neneve të projektligjit janë identike me ligjin në fuqi, me vetëm disa ndryshime minimale në organizim dhe zgjerim të disa elementeve.
“Shkalla e kontributit mbetet e njëjtë, 3.5% nga punëdhënësi dhe 3.5% nga punëtori. Është shtuar mundësia që Fondi të ofrojë sigurime shëndetësore vullnetare sikurse siguruesit e licencuar në sektorin privat. Janë definuar pak më në detaje disa elemente, në veçanti sa i përket personave të varur nga i siguruari dhe të tjerët që duhet të mbulohen me sigurim nga shteti”, ka theksuar ai.
Hoti ka kritikuar gjithashtu mosfunksionalizimin e sigurimeve shëndetësore dhe të sistemit informatik shëndetësor, ndërsa ka theksuar kaosin me listën e barnave esenciale dhe furnizimin joefikas.
Ai gjithashtu ka thënë se emigrimi i mjekëve është rritur për 50% që nga viti 2021 dhe buxheti për shëndetësi mbetet larg standardeve evropiane.
“Pas katër vitesh në qeverisje, ende nuk kemi sigurime shëndetësore funksionale dhe investimet kapitale për modernizimin e institucioneve janë të ulëta”, ka shkruar ai mes të tjerash në rrjetin social Facebook.