Banka e Kursimeve Postare të Serbisë ka ngritur katër degë bankare në afërsi të pikave kufitare, Jarinjë, Bërnjak, Konçul, Merdare, në mënyrë që t’u ofrojë para të gatshme, t’u sigurojë qasje sa më të afërt në bankomate e shërbime të tjera bankare serbëve të Kosovës.
Siç thuhet në një njoftim të së ashtuquajturës “Zyrë për Kosovën në Qeverinë e Serbisë”, Banka e Kursimeve Postare e Serbisë vendosi të marrë këtë hap, pasi siç theksojnë për shkak të veprimeve të njëanshme dhe të paligjshme të kryeministrit Albin Kurti.
“Për shkak të lëvizjeve të njëanshme dhe të paligjshme të Albin Kurtit i cili nga 1 shkurti i këtij viti ndaloi përdorimin e dinarëve dhe listës së pagave të Republikës së Serbisë në Kosovë, serbët nuk janë në gjendje të marrin pagat, pensionet sociale dhe të gjitha përfitimet tjera e paguara nga shteti i Serbisë, të cilat janë të nevojshme për jetën dhe punën e tyre”, thuhet në njoftim.
Sipas njoftimit, degët e kësaj banke do të jenë në dispozicion të qytetarëve çdo ditë punë dhe të shtunën nga ora 09:00 deri në 17:00.
