Kryeministri i vendit, Albin Kurti, ka pranuar një letër urimi nga kancelari i Gjermanisë, Friedrich Merz, me rastin e rizgjedhjes së tij në postin e kryeministrit dhe formimit të Qeverisë së re.
Në letrën e tij, Merz e ka uruar Kurtin për rizgjedhjen, duke theksuar se Kosova ka kaluar muaj të tërë me pasiguri politike, të cilat, sipas tij, i kanë shkaktuar vendit kosto të larta, njofton Dukagjini.
“Ju përgëzoj përzemërsisht për rizgjedhjen Tuaj Kryeministër i Republikës së Kosovës. Kosova ka lënë pas muaj të tërë të pasigurisë politike, e cila i ka imponuar vendit kosto të larta. Konfirmimi i zgjedhjes Tuaj ofron mundësinë e ndërtimit të urave përtej prizmit partiak, zgjidhjes së çështjeve të hapura institucionale dhe avancimit të reformave”, shkroi Merz.
Kancelari gjerman i ka uruar Kurtit sukses në mandatin e ri qeverisës, ndërsa ka theksuar se Gjermania do të vazhdojë ta mbështesë Kosovën.
Merz ka nënvizuar gjithashtu miqësinë e veçantë që, siç ka shkruar ai, Gjermania ka me popullin e Kosovës.