Ministri i Jashtëm i Çekisë, Jan Lipavsky, është shprehur i shqetësuar pas tërheqjes së serbëve të Kosovës nga institucionet e vendit.
Me anë të një postimi në llogarinë e tij në Twitter, Lipavsky u ka bërë thirrje të dy palëve që të përmbahen nga çdo veprim që mund të çojë në përshkallëzim të situatës dhe në tensione.
“Jam shumë i shqetësuar për tërheqjen e serbëve të Kosovës nga institucionet e Kosovës. U bëj thirrje të gjithë të përfshirëve që t’i kushtojnë vëmendje thirrjes që përmban Deklarata e Përfaqësuesit të Lartë, Josep Borrell, në emër të BE-së”, ka shkruar ai.
I am very concerned about the withdrawal of Kosovo Serbs from Kosovo institutions. I urge all involved to heed the call contained in the Statement by the High Representative @JosepBorrellF on behalf of the EU 🇪🇺 ➡️ https://t.co/2tUwEXbPrh
— Jan Lipavský (@JanLipavsky) November 6, 2022
Ndërkaq, në një komunikatë për media, ministria e Punëve të Jashtme e Çekisë, u ka bërë thirrje të gjithë përfaqësuesve të serbëve në Kosovë që të kthehen në institucionet e Kosovës.
“U bëjmë thirrje përfaqësuesve të Serbisë dhe serbëve të Kosovës që të kthehen në institucionet e Kosovës. U bëjmë thirrje të dyja palëve të përmbahen nga çdo veprim që do të çonte në dhunë dhe konfrontim”, thuhet në njoftim.
Ndërkaq, po ashtu thuhet se “duhet të themelohet Asociacioni i Komunave me Shumicë serbe”.
#CZPRES calls on Serbia and Kosovo Serb representatives to return to the Kosovo institutions. We call on both sides to refrain from any action that would lead to violence and confrontation. The Association of Serb Majority Municipalities must be established. ⬇️
— Czech MFA (@CzechMFA) November 6, 2022
Të shtunën e pesë nëntorit, përfaqësuesit e Listës Serbe kanë vendosur për bojkotimin e institucioneve të Kosovës.
Pos zyrtarëve policorë, punonjësve të gjykatave dhe institucioneve të tjera, dorëheqje kanë dhënë edhe kryetarët e komunave veriore dhe Goran Rakiq nga pozita e ministrit për Komunitete dhe Kthim në Qeverinë e Kosovës.
Ky vendim është marrë pas një takimi të zhvilluar në mesditën e së shtunës në Zveçan.
Njoftimi vjen pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS.
Ndërkaq, në Mitrovicën e Veriut, të dielën është mbajtur një protestë – e thirrur nga Lista Serbe – për shkak të vendimit të Prishtinës për riregjistrimin e makinave me targa serbe në targat RKS – Republika e Kosovës.
Prej 1 nëntorit, Qeveria e Kosovës ka nisur të zbatojë planin e saj – në tri faza – për riregjistrimin e makinave me targa të lëshuara nga Serbia.
Faza e parë përfshin qortimin e shoferëve, e dyta parasheh gjobë deri në 150 euro për ata shoferë, dhe e treta targa provuese.
Zbatimi i këtij plani pritet të përfundojë më 21 prill dhe, nga ajo datë, në qarkullim do të lejohen vetëm makina me targa RKS.
Shtetet e Bashkuara dhe Bashkimi Evropian kanë shprehur zhgënjim pse Qeveria e Kosovës nuk ka vepruar në përputhje me kërkesën e tyre për shtyrje 12-mujore të vendimit për targat.
Kosova dhe Serbia kanë nisur negociatat për normalizimin e marrëdhënieve më 2011, me ndërmjetësimin e Bashkimit Evropian.
Procesi i negociatave pritet të përfundojë me marrëveshje ligjërisht të detyrueshme.
Ndonëse Kosova deklaron se kjo marrëveshje duhet të përfshijë njohjen e ndërsjellë, Serbia nuk pranon, duke insistuar në “zgjidhje kompromisi”.